VAZHGA VALAMUDAN

Tuesday, November 29, 2011

ஆயுள்காக்கும் ஆயுர்வேதம்-முழங்கால் மூட்டில் ஒலி

ஆயுள்காக்கும் ஆயுர்வேதம்
பேராசிரியர் எஸ்.சுவாமிநாதன், ஸ்ரீ ஜயேந்திர சரஸ்வதி

முழங்கால் மூட்டில் வ... என்ன செய்ய வேண்டும்?
எனக்கு 42 வயதாகிறது. ஐந்து மாதங்களாக முழங்கால் மூட்டு வலியுள்ளது. உட்கார்ந்து எழுந்தால் "பட் பட் பட்' என்று முழங்கால் மூட்டில் இருந்து ஒலி வருகிறது. வலது கால் முழங்கால் மூட்டில்தான் அதிக வலி. அதுபோல வலது தோள் பட்டையிலும், வலது குதிகாலிலும் வலி உள்ளது. இதற்கு ஆயுர்வேத மருந்துகள் மூலம் தீர்வு கிடைக்குமா?
ஒரு வாசகி, கமலாபுரம்.
"சிலேஷக சிலேஷ்மா' என்று ஒரு பசை வஸ்து இருக்கிறது. மனித உடலிலுள்ள சிறிய, பெரிய சகல மூட்டுகளுக்கிடையே கட்டுத் தளராமல் வழவழப்பையுண்டு பண்ணிக் கொண்டு இருக்கிற இந்தப் பசை வஸ்து உங்களுக்கு வறண்டு போய்விட்டதோ? என்று தோன்றுகிறது. இந்த சிலேஷக சிலேஷ்மாவுக்கு ஏற்படும் கோளாறினால் கீல் பிடிப்பு, முடக்கு வலி முதலிய உபாதைகள் ஏற்படும். இரண்டு எலும்புகளுக்கிடையே அமைந்துள்ள இந்தப் பசையினால், உராய்வு ஏதும் ஏற்படாமல் எலும்புகள் பாதுகாக்கப்படுகின்றன. குணங்களின் வாயிலாக செயல்களை நிகழ்த்தும் இந்த சிலேஷ்மா, வறண்டுவிடாமலிருக்க, அதன் நெய்ப்பு, குளிர்ச்சி, கனம், மந்தம், மழமழப்பு, கொழ கொழப்பு, நிலையான தன்மை போன்ற குணங்களை நீங்கள் உணவின் மூலமாகவும், செயல்களின் வாயிலாகவும், மருந்துகளின் மூலமாகவும் சம்பாதித்துக் கொள்ள வேண்டும்.
முதலில் உணவைப் பற்றி ஆராய்ந்து தெளிவுறுதல் நலமாகும். நிலம், நீர் ஆகியவற்றை ஆதிக்ய பூதங்களாக்கிய சிலேஷ்மா எனும் கபதோஷத்தைப் பெற இனிப்புச் சுவை கொண்ட உணவு வகைகள் உதவிடக்கூடும். ஏனென்றால் இனிப்புச் சுவையானது, நிலம் மற்றும் நீரினால் உருவாகிறது. ஆனால் இந்த இரு மகா பூதங்களை, குடலிலிருந்து முட்டியின் ஜவ்வு வரை எடுத்துச் செல்வது எளிதல்ல. அதற்குக் காரணம், அவை இரண்டும் கனமான வஸ்துக்களாக இருப்பதுதான். அவற்றைக் கொண்டு செல்ல புளிப்பு மற்றும் உப்புச் சுவைகளை நீங்கள் மிதமாக உணவில் சேர்க்க வேண்டும். நெருப்பில் எளிதாக வேகக் கூடிய நிலம் மற்றும் நீரினால், எலும்புக்களுக்கிடையே அமைந்துள்ள சிலேஷக சிலேஷ்மா வளர்ந்து, முழங்கால் மூட்டில் ஏற்படும் "பட் பட்' என்ற சப்தம் குறைய வாய்ப்பிருக்கிறது. அரிசியை நன்றாகக் கழுவி, கஞ்சியை வடித்து, நன்கு பக்குவப்படுத்தி, அதிலுள்ள ஆவிப் புகை அடங்கிய பின், சூடான சாதத்துடன் பால், புலால் ஆகியவை கலந்து காலை உணவாகச் சாப்பிடுவது மிகவும் நல்லது. மதிய உணவுக்கு முன் வாழைப்பழம் சாப்பிட உகந்தது. மாலையில் அத்திப் பழமும், இரவில் உலர்ந்த திராட்சையும் சாப்பிடவும்.
அதிக நேரம் நின்று கொண்டு வேலை செய்தல், தரையில் அமர்தல், குளிர்ந்த நீரில் குளித்தல் போன்ற செயல்களைத் தவிர்க்கவும். சமையல் செய்வதானால் ஒரு ஸ்டூலில் அமர்ந்து கொண்டு செய்து, முழங்கால் மூட்டுகளுக்குப் போதுமான ஓய்வு அளிப்பது நல்லது. நேரம் கிடைக்கும்போதெல்லாம் படுக்கையில் படுத்திருந்து, கால் மூட்டுகளுக்கு அதிக வேலைப் பளு தராமலிருப்பதால், உட்புற ஜவ்வு வலுப் பெற வழி ஏற்படும்.
"ஜடாமயாதி' என்று ஒரு சூரண மருந்து விற்பனையாகிறது. அரிசியை வேக வைத்து, வடித்தெடுத்த கஞ்சியுடன் இந்தச் சூரணத்தைக் குழைத்து, வெதுவெதுப்பாக முழங்கால் மூட்டுகளில் காலை, மாலை உணவுக்கு முன் சுமார் ஒரு மணி நேரம் பற்று இட்டு வைத்தல் மூலம், சிலேஷக சிலேஷ்மா வளர்வதற்கும், வலியைப் போக்குவதற்கும் உதவும். சுமார் 21 நாட்கள் முதல் 48 நாட்கள் வரை பற்றிடலாம். நன்றாகப் பசியெடுத்துச் சாப்பிடக் கூடியவராக நீங்களிருந்தால், க்ஷீரபலா 101 எனும் கேப்ஸ்யூல் மருந்தை, காலை, மாலை 6 மணிக்கு, வெறும் வயிற்றில், சிறிது வெது
வெதுப்பான பாலுடன் சுமார் 3 - 6 மாதங்கள் தொடர்ந்து சாப்பிட்டு வர, மூட்டு வலி குறைவதற்கான வாய்ப்பு நிறைய இருக்கிறது.
உணவில் காரம், கசப்பு, துவர்ப்புச்சுவை, எண்ணெய்ப் பசையற்ற உணவு போன்றவற்றைத் தவிர்க்கவும்; அல்லது குறைக்கவும். சைக்கிள் சவாரி, பேருந்தில் நின்று கொண்டு பயணித்தல், கால் மேல் கால் போட்டு அமருதல், அடிக்கடி கால்களை ஆட்டிக் கொண்டிருத்தல் போன்றவற்றையும் தவிர்ப்பது நலம்.
கால் மூட்டுகளிலும் தோள் பட்டையிலும் கணுக்கால்களிலும் மூலிகைத் தைலங்களைப் பூசுதல், மூலிகை இலைகளால் வேக வைக்கப்பட்ட நீரிலிருந்து வெளியாகும் நீராவியை, வலி உள்ள பகுதிகளில் காண்பித்து வியர்வையை வரவழைத்தல், வலி உள்ள பகுதிகளில் எண்ணெய் கட்டுதல் போன்ற சிறந்த சிகிச்சை முறைகளை ஆயுர்வேத மருத்துவமனைகளில் நீங்கள் செய்து கொள்வது நலமே

--
YOURS VAAZHGA VALAMUDAN
B. SRINIVASAN.M.A.,M.Ed.,M.C.A.,M.A(YOGA)
KRISHNAGIRI - 635 001
CELL : 99943-94610
srinivasanb2401@blogspot.com

Monday, November 14, 2011

முழங்கால் மூட்டில் வலி - ஆயுள்காக்கும் ஆயுர்வேதம்

Friday, November 11, 2011

மந்தமாகச் செயல்படுவதை வேகப்படுத்துவது எப்படி?

ஆயுள்காக்கும் ஆயுர்வேதம்: மந்தமாகச் செயல்படுவதை வேகப்படுத்துவது எப்படி?
பேராசிரியர் எஸ். சுவாமிநாதன்
எனக்கு வயது 55. நினைவு தெரிந்த நாளிலிருந்து எந்தச் செயலையும் "சடக்'கென்று செய்ய இயலாது. சிறிது நேரம் உடலை இங்குமங்கும் நகர்த்தி பிரயத்தனம் செய்தால் மட்டுமே எச்செயலையும் செய்ய முடியும். தசைப் பகுதிகள் இறுக்கமாக இருப்பதால், படி ஏறும்போது
முதல் நான்கு படிகள் சிரமப்பட்டு ஏற வேண்டும். அதன் பிறகுதான் எளிதாக ஏற முடிகிறது. இதேபோல், உடலில் உள்ள எல்லாத் தசைப் பிரிவுகளுமே சிறிதுநேர
முயற்சிக்குப் பின்பே செயல்பட முடிகிறது. இதற்கு
ஆயுர்வேதத்தில் தீர்வு உண்டா? க.அழகுராஜன், விருதுநகர்.

மூளைப் பகுதியிலிருந்து இடப்படும் கட்டளைகளான "எழுந்திரு, நட, உட்கார், படு' போன்ற செய்தித் தொகுப்பினைத் தசைப் பகுதிகளில் அமைந்துள்ள நரம்புகள் ஏற்று, அதன்படி செயல்படுவதும், தோலில் ஏற்படும் தொடு உணர்ச்சியினை, அதனடியில் அமைந்திருக்கும் நரம்புகளின் வழியாக மூளைக்கு எடுத்துச் செல்வதுமான ஓர் உணர்ச்சிகளின் போராட்டம் உயிருள்ள ஒரு மனித உடலில் எந்நேரமும் நடந்து கொண்டிருப்பது ஓர் இயல்பான நிகழ்ச்சியாகும்.
கண நேரத்தில் நடைபெறும் இச்செயல்களின் வேகமானது, உங்களுடைய விஷயத்தில் மந்தமான கதியில் நடைபெறுகிறது.
நினைவு தெரிந்த நாளிலிருந்தே இப்படித்தான் இருக்கிறது என்று நீங்கள் கூறுவதால், இது தாய், தந்தையரின் "பீஜ தோஷத்தினால்' ஏற்பட்டுள்ளதோ என்று ஒரு சந்தேகம் எழுகிறது. "பீஜம்' என்றால் விதை என்று பொருள். நல்ல சத்தான ஒரு விதையை, பண்பட்ட ஒரு நிலத்தில் விதைத்தால், செழிப்பான ஒரு செடி வளருவதை நாம் காணலாம். அதுபோல, ஓர் ஆரோக்கியமான குழந்தை பிறப்பதற்குத் தாயின் சினைமுட்டையும், தந்தையின் விந்துவும், த்ரிதோஷங்களாகிய வாத - பித்த - கப தோஷங்களின் சமநிலையைப் பெற்றிருக்க வேண்டும். வாதம் என்னும் தோஷத்தின் ஆதிக்க குணங்களாகிய வறட்சி, குளிர்ச்சி, முறமுறப்பு, நுட்பம், அசையும் தன்மை போன்றவை கூடுதலாகவோ அல்லது குறைவாகவோ காணப்பட்டால், பிறக்கும் குழந்தைக்கு அதன் தாக்கமானது மூளையிலும் தசை நரம்புகளிலும் காணும். இருந்தாலும் பெற்றோரை மட்டுமே குறை கூறுவதும் தவறாகும். நீங்கள் வளர்ந்த சூழ்நிலை, இடம், உணவுமுறைகள், செய்யும் தொழில் போன்றவையும் காரணமாகலாம்.
மூளை மற்றும் தசைப் பகுதிகளைச் சார்ந்த நரம்புகளில் அமைந்துள்ள வாயுவின் செயல்திறனைச் சீராக்க வேண்டிய அவசியம் உங்களுக்கு இருக்கிறது. மூளை நரம்புகளை வலுப்படுத்தக்கூடிய க்ஷீரபலா தைலம், கார்ப்பாஸôஸ்த்யாதி தைலம், பலா குடூச்யாதி தைலம், மதுயஷ்ட்யாதி தைலம், தசை நரம்புகளை வலுப்படுத்தக் கூடிய மஹாமாஷ தைலம், பலா அஸ்வகந்தாதி குழம்பு, வாதமர்த்தனம் குழம்பு, தான் வந்திரம் தைலம் போன்றவற்றை ஓர் ஆயுர்வேத மருத்துவரின் ஆலோசனைப்படி உபயோகித்து நீங்கள் நல்ல பலனைப் பெறலாம்.
இனிப்பு, புளிப்பு, உப்புச் சுவை, வாத தோஷத்தை சீராக்கும் திறன் உடையவை என்பதால் இந்தச் சுவைகளை மிதமாக உணவில் சேர்க்கவும். காரம், கசப்பு, துவர்ப்புச் சுவை, வாதத்தின் சீற்றத்தை அதிகப்படுத்தும் தன்மையுடையவை என்பதால், இச்சுவை நிறைந்த உணவு வகைகளைக் குறைக்கவும். ஒவ்வொரு உணவுக்குப் பிறகும், புளிப்புச் சுவையுள்ள மோர், எலுமிச்சம் பழச்சாறு கலந்த வெதுவெதுப்பான தண்ணீர், புளிப்பான கருந்திராட்சை பழச்சாறு போன்றவற்றில் ஒன்றை அருந்துவது, வாயுவின் சீரான செயல்பாட்டுக்கு அனுகூலமானதாக இருக்கும்.
தலையில் மூலிகைத் தைலங்களை வெதுவெதுப்பாக நிரப்பி வைக்கும் "சிரோவஸ்தி' எனும் முறையும், ஆசனவாய் வழியாக செலுத்தப்படும் தைலம் மற்றும் மூலிகைக் கஷாயமுறைகளும் உங்களைப் போன்ற உபாதை உள்ளவர்களுக்கு மிகச் சிறந்த ஆயுர்வேத சிகிச்சை முறைகளாகும். ஆயுர்வேத மருத்துவமனையில் தங்கியிருந்து இந்தச் சிகிச்சைகளைச் செய்து கொள்வது மிகவும் நல்லது.
உள் மருந்துகளாக விதார்யாதி கஷாயம், தசமூலம் கஷாயம், க்ஷீரபலா 101, முஸ்தாதி மர்ம கஷாயம், பிரசாரிண்யாதி கஷாயம், தான் வந்திரம் கஷாயம் போன்றவற்றை பசியின் தன்மைக்கு ஏற்ப, பாலுடனோ, வெந்நீருடனோ சாப்பிடுவது நல்லது. இதற்கும் ஓர் ஆயுர்வேத மருத்துவரின் ஆலோசனை தேவைப்படும்.

Tuesday, November 1, 2011

ஆயுள்காக்கும் ஆயுர்வேதம்: தீராப் பசிக்கு என்ன காரணம்?
பேராசிரியர் எஸ்.சுவாமிநாதன், ஸ்ரீ ஜயேந்திர சரஸ்வதி

என் வயது 21. சைவ, அசைவ உணவுகளை வயிறு முட்டச் சாப்பிட்டாலும் 15 நிமிடங்களில் மீண்டும் பசி எடுத்துவிடுகிறது. இதனால் அடிக்கடி சாப்பிடுகிறேன். இவ்வளவு சாப்பிட்டும் உடல் மெலிந்து காணப்படுகிறேன். என்னுடைய தீராப் பசிக்கு என்ன காரணம்?
அபுபக்கர், திருச்சி-8
குடிசை வீடு பற்றி எரிந்து கொண்டிருக்கிறது. காற்று வீசாமலிருந்தால் அந்தக் குடிசை மட்டுமே எரியும். கரியிலுள்ள நெருப்பை ஒரு குழலால் ஊதி, தங்க நகையை உருக்கி ஒட்டுவதை நீங்கள் பார்த்திருக்கக் கூடும். இந்த இரு உதாரணங்களின் மூலம் நாம் அறிந்து கொள்வது, நெருப்பு கொழுந்துவிட்டு எரிவதற்கு காற்றின் தேவை மிக அவசியமானது என்பதுதான். இதேபோலவே உங்களுடைய வயிற்றிலும் நடந்து கொண்டிருக்கிறது. பசித்தீயின் அருகில் ஸமான வாயு எனும் ஒரு வாயு செயல்படுகிறது. பசித் தீயைத் தூண்டுகிறது.
சீரணப்பை, இரைப்பை, தோஷங்கள், மலங்கள், விந்து, மாதவிடாய் இவற்றைச் செயல்படுத்தும் நரம்புக் குழாய்களில் உலாவுகிறது. இதன் உதவியால் உணவை ஏற்றுக் கொள்ளுதல், சீரணிக்கச் செய்தல், உணவைப் பிரித்தல், மலத்தைக் கீழ் நோக்கிச் செலுத்துதல் ஆகிய செயல்கள் நடைபெறுகின்றன.
ஸமான வாயுவின் தூண்டுதலின் மூலம் கொழுந்துவிட்டு எரியும் உங்களுடைய பசித் தீயில் வந்துவிழும் உணவுப் பொருட்கள் அனைத்தும் விரைவாகச் செரிக்கின்றன. ஆனாலும் உடல் ஊட்டமடையவில்லை. உணவின் சத்து உடல் உட்புறப் பகுதிகளில் சேராமல், பெருமலமாகவும், சிறுநீர் வழியாகவும், வியர்வையின் வழியாகவும் வெளியேறத் தொடங்கினால், உடல் ஊட்டம் பெறாமல், மெலிந்தேயிருக்கும். கிணற்றைத் தூர் வாரிவிட்டால், கிணற்றிலுள்ள உறைகளின் இடுக்கிலிருந்து புதிய நீர் ஊறி, புதிய தண்ணீர் நிரம்புவதைப் போல, கெட்டுப் போயுள்ள குடலின் பித்த நீரையும், காற்றையும் நீங்கள் வெளியேற்ற வேண்டும். அதற்கு ஆயுர்வேத லேகிய மருந்தாகிய கல்யாணகுலம் உதவக் கூடும்.
காலையில் குடித்த புழுங்கலரிசிக் கஞ்சித் தண்ணீர் நன்றாகச் செரித்த பிறகு, மதிய வேளையில் இந்த லேகிய மருந்தை சுமார் 15 - 20 கிராம் நக்கிச் சாப்பிட, தேவையற்ற கெட்டுப் போன பித்த - வாயு நன்றாக நீர்ப்பேதியாகி வெளியேறிவிடும். பதினைந்து நாட்களுக்கு ஒருமுறை, இதுபோல சுமார் ஒன்று அல்லது இரண்டு மாதங்களுக்குச் செய்து கொள்வது மிகவும் நல்லது. புதிய பித்தநீரின் வரவால் உங்களுடைய பசியானது கட்டுக்குள் வந்துவிடும். அதை மதிக்காமல் மீண்டும் நீங்கள் உணவை அதிகமாக ஏற்பது தவறாகும். "தீயளவு அன்றித் தெரியான் பெரிதுண்ணின் நோயளவு இன்றிப் படும்' என்ற வள்ளுவர் பெருமான் கூறியதை நினைவில் நிறுத்திக் கொள்ளவும். தன் ஜீரண சக்தியை மதிக்காமல் அளவுக்கு மீறி அதிகமாக உண்பவனுக்கு நோயும் அளவுக்கு மீறி எல்லையின்றி ஏற்படும் என்ற அவருடைய குறிப்பை மதித்துச் செயல்படவும். காலையிலும் இரவிலும் மித உணவை எளிதில் செரிக்கக்கூடிய வகையில் சாப்பிடவும். மதிய வேளையில் நன்றாகச் சாப்பிடலாம்.
விதார்யாதி கிருதம் எனும் ஆயுர்வேத நெய் மருந்தை லேசாக உருக்கி, காலை, மாலை சுமார் 15 மி.லி. 41 -48 நாட்களுக்கு வெறும் வயிற்றில் சாப்பிட்டு வர, ஸமான வாயுவின் சீரான செயல்பாட்டையும், பசித்தீயின் உக்ரத்தைக் குறைத்தும், உடல் தேவைக்கான அளவில் போஷணத்தையும் நிறைவாக நீங்கள் பெறலாம். அப்ரக பஸ்மம் தற்சமயம் கேப்ஸ்யூல் வடிவில் வரத் துவங்கியுள்ளது. உணவிற்கு சுமார் 1/2 - 1 மணி நேரத்துக்கு முன்பாகச் சிறிது வெதுவெதுப்பான பாலுடன் பருக, பித்த வாயுக்களின் சீற்றத்தை அடக்கி, உடலுக்கு நல்ல ஊட்டத்தையும் பெறலாம்.
உணவில் இனிப்புச் சுவையை சற்றுக் கூடுதலாகச் சேர்த்துக் கொள்ளவும். மாவுச் சத்துள்ள பண்டங்கள், அதன் பிரிவுகளான சர்க்கரைகள், நெய் முதலிய சில கொழுப்புப் பண்டங்கள் இனிப்பு வகையில் அடங்கும். பித்த வாயுவை அடக்குவதில் மற்ற சுவைகளைவிட, இனிப்புச் சுவை சிறந்தது. கண்களின் தெளிவு, கேசங்களின் அடர்த்தி, தசை வலிவு, மேனி நிறம், திசுக்களின் வளர்ச்சியும் அடர்த்தியும், ரஸ - ரக்த தாதுக்கள் தோஷமற்றுத் தெளிந்திருப்பது போன்றவை இனிப்புச் சுவையின் தனிச் சிறப்புச் செயல்களாகும்.
thanks : thina mani kadhir

Friday, October 21, 2011

ஆயுள்காக்கும் ஆயுர்வேதம் -பொடுகு

ஆயுள்காக்கும் ஆயுர்வேதம் -பொடுகு
எனக்கு வயது 25. தலையில் அரிப்பும், பொடுகும், முடிகொட்டுவதாகவும் இருக்கிறது. தலை வறண்டு, வெடித்து, செம்பட்டை முடிகளால் அவதிப்படுகிறேன். இதற்கு ஆயுர்வேத மருந்து உள்ளதா? ஜி.லதா, சிதம்பரம்.
தலையிலுள்ள தோல் பகுதிக்கு எண்ணெய் பதமிடுவது மிகவும் அவசியம். அப்படிப் பதமிடுவதால் தலை முடிக்கும் அது பயன் தருகிறது. நீங்கள் காலையில் குளிப்பதற்கு சுமார் 3/4 மணி - 1 மணி நேரம் முன்பாக, ஆயுர்வேத மூலிகைத் தைலமாகிய தூர்வாதி கேர (தேங்காய் எண்ணெய்) தைலத்தை பஞ்சில் முக்கி எடுத்து, தலைமுடியை நன்றாகப் பிரித்துவிட்டு, மயிர்க் கால்களில் ஊற வைக்கவும். நன்றாக ஊறிய பிறகு, மருதாணி இலை, எள், அதிமதுரம், நெல்லிக்காய் இவற்றைப் பால் விட்டு
அரைத்துப் பால்விட்டுத் தளர்த்தி சிறிது சுட வைத்து, எண்ணெய் தடவிய தலையில் சிறிது நேரம் அப்பி ஊற வைத்துக் குளிக்க நல்லது. அதுபோலவே, கரிசலாங்கண்ணி இலையையும், நெல்லிக்காய்களையும், அதி மதுரத்தையும் அரைத்துப் பூசிக் குளிக்கலாம். இப்படிச் செய்வதால், தலைமுடியிலும், தோலிலும் எப்போதும் எண்ணெய்ப் பசை இருக்குமாறு பார்த்துக் கொள்ளலாம். உங்களுடைய கடிதத்தில் ஷாம்பு உபயோகிப்பதில்லை என்று குறிப்பிட்டுள்ளீர்கள். சீயக்காய்த் தூள் மட்டுமே உபயோகிப்பதாகவும் எழுதியுள்ளீர்கள். இருந்தாலும் சீயக்காய் தூளிலுள்ள வறட்சியைக் குறைக்க நெல்லிக்காய் வற்றல், வெந்தயம், காய்ந்த எலுமிச்சம் பழத்தோல் முதலியவற்றுடன் சேர்த்து அரைத்து, சாதம் வடித்த கஞ்சியில் இவற்றைக் குழைத்துத் தேய்த்துக் கொள்வதும் நல்லதே.
உடல் சூட்டால், தலையில் பொடுகும், அரிப்பும் ஏற்படலாம். குடலில் மலப் பொருட்கள் தங்கத் தங்க, உடலில் அழற்சியும் சூடும் அதிகமாகும். அதனால், அதை வெளியேற்ற ஆயுர்வேத மூலிகை லேகிய மருந்தாகிய திரிவிருத் லேகியத்தைச் சுமார் 10-15 கிராம், காலையில் குடித்த கஞ்சி, செரிமானம் ஆன நிலையில், மதிய உணவுக்கு முன் நக்கிச் சாப்பிடவும். நீர்ப்பேதியாகி, குடலிலுள்ள மலமும் அழுக்கும் நீங்குவதால், உடற்சூடு நன்றாகக் குறைந்துவிடும். மாதம் ஒருமுறை இப்படிச் செய்து கொள்ளலாம்.
நீங்கள் மனதையும் அமைதியுடன் வைத்திருக்கப் பழக வேண்டும். மனதில் எழும் கோபதாபங்களால் உடல் சூடு அதிகரித்து தோலில் வறட்சி ஏற்படும். மனத்தின் அமைதிக்கான நற்பண்புகள் உங்கள் உபாதையைக் குறைக்க உதவும். இரவில் படுக்கும் முன் உள்ளங்கால்களுக்குத் தேங்காய் எண்ணெய்த் தடவி கொள்வதன் மூலமாகவும் உடல் சூட்டைத் தணித்துக் கொள்ளலாம்.
தலைக்கு விட்டுக் குளிக்கும் தண்ணீரும் சுத்தமானதாக இருத்தல் நலம். குளோரின், ப்ளீச்சிங் பவுடர் போட்ட தண்ணீரைத் தலையில் விட்டுக் குளித்தால், வறட்சி ஏற்பட்டு, பொடுகு ஏற்படலாம். தண்ணீரை ஒரு பாத்திரத்திலூற்றி, இரவு முழுவதும் ஆடாமல் வைத்திருந்து, மறுநாள் காலை துணியால் வடிகட்டி, தலை குளிக்கப் பயன்படுத்தவும்.
உள் மருந்தாக, நாரசிம்ஹ ரசாயனம் எனும் லேகிய மருந்தைக் காலை, மாலை 6 மணிக்கு, வெறும் வயிற்றில் சுமார் 5 - 10 கிராம் நக்கிச் சாப்பிடவும். தொடர்ந்து 3 - 6 மாதங்கள் வரை சாப்பிடலாம்.

பேராசிரியர் எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி,
நசரத்பேட்டை - 600 123 (பூந்தமல்லி அருகே)
செல் : 9444441771
நன்றி : தினமணி கதிர்

ஆயுள் காக்கும் ஆயுர்வேதம்: அரிப்பும் தடிப்பும் நீங்க...!

ஆயுள் காக்கும் ஆயுர்வேதம்: அரிப்பும் தடிப்பும் நீங்க...!

என் வயது 49. வாயுவையும் பித்தத்தையும் அதிகரிக்கும்
பொருட்களைச் சாப்பிட்டால் எனக்கு உடல் அரிப்பும் தடிப்பும் தொடங்கிவிடுகிறது. ஆனால் நான் அரிப்புக்குக் காரணம் கபம் என்று படித்தேன்.
இந்த கப, பித்த, வாயுவின் சீற்றங்களைக் குறைத்து
என் உடல் ஆரோக்கியம் மேம்பட வழிகள் எவை?
ஷாகிதா, சென்னை.
மருந்தளிப்பது இருவகையாகும். ஒன்று சோதனம் -
மருந்து கொடுத்து உடலுக்குள்ளிருந்து சீற்றமுற்ற வாத பித்த கப தோஷங்களை வெளியில் வரச் செய்வது. இரண்டாவது சமனம் - உடலுக்குள்ளேயே சீற்றமுற்ற தோஷங்களைத் தணித்து நிறுத்தல்.
வாத தோஷத்திற்கான சிறந்த சோதனமுறை வஸ்தியும், சிறந்த சமனமுறை தைலமுமாகும். வஸ்தி என்றால் ஒரு குழாய் போன்ற கருவியினால் ஆசன வாய் வழியாகத் தைலம், மூலிகைக் கஷாயம்
போன்றவற்றைச் செலுத்தி, குடலைக் கழுவுவதற்கான முயற்சியாகும். நல்லெண்ணெயை வெதுவெதுப்பாக உடலெங்கும் தேய்த்து 1/2 - 1 மணி நேரம் ஊறி வெதுவெதுப்பான தண்ணீரில், காலையில் குளிப்பதும் அல்லது விளக்கெண்ணெயை வெதுவெதுப்பான பாலுடன் சாப்பிட்டு, குடலிலுள்ள வாயுவின் சீற்றத்தை இதமாக அடக்குவது போன்றவை சோதன - சமன முறைகளில் சிறந்தது.
பித்த தோஷத்திற்கான சிறந்த சோதன முறை விரேசனமாகும். பித்தத்தைப் பேதி மூலம் வெளியேற்றும் முறை. உடல் வலுவில்லாமல், தோஷமும் குறைவாக இருந்தால், பித்தத்தின் சீற்றத்துக்குச் சமனம் எனும் அணுகுமுறையே சிறந்தது. திக்தககிருதம், தாடிமாதிகிருதம், விதார்யாதிகிருதம் போன்ற நெய் மருந்துகளால் இது சாத்தியமாகும்.
கப, தோஷ சீற்றத்துக்குச் சிறந்த சோதனம் "வமனம்' எனப்படும் வாந்தி செய்வித்தலாகும். வாந்தி ஆகும்போது, இளகிய கபமும் வெளியேறிவிட்டால், உடல் உட்புற உறுப்புகள் சுத்தமாகும். ஆனால் வாந்தி சிகிச்சை செய்து கொள்ள முடியாத வலுவற்ற உடல் நிலைகளில், தேன் மருந்தாக அதாவது சமனம் எனும் அருமருந்தாகப் பயன் தரக்கூடும். கபத்தைக் குறைக்கும் சூரண மருந்துகளுடன் தேன் சேர்த்துக் கொடுத்தால், கபத்தின் சீற்றமானது விரைவில் மட்டுப்படும்.
தோஷங்களாகிய வாத, பித்த, கபங்களைச் சம
நிலையில் நிறுத்த உணவு, உறக்கம், உடலுறவு இவை மூன்றும் முறைப்படி யுக்தியாக அமையப் பெற உடல் நிலைத்து நிற்கும். ஒரு வீடானது தூண்களால் தாங்கப் பெறுவதுபோல் இவை மூன்றும் உடலைத் தாங்குகின்றன. உடலுறவு நடுவயதில் மட்டும் உதவும். மற்ற இரண்டும் வாழ்நாள் முழுவதும் தாங்கும் தூண்கள்.
"கபம் வினா கண்டூ:' அதாவது கபமில்லாமல் அரிப்பில்லை என்ற சித்தாந்தத்தை நீங்கள் நன்றாக அறிந்திருக்கிறீர்கள். அதனால் திரிதோஷங்களாகிய வாத, பித்த, கபங்களின் சமநிலையை அடைய, முன் குறிப்பிட்ட சோதன - சமன முறைகளை நீங்கள் ஆயுர்வேத மருத்துவமனையில் எடுத்துக் கொள்ளவும்.
"ஹரித்ராகண்டம்' எனும் ஆயுர்வேத மூலிகைப் பொடி மருந்தை காலை, மதியம், இரவு 1 ஸ்பூன் (5 கிராம்) உணவுக்கு முன்பு தொடர்ந்து சாப்பிட்டு வர, உங்களுடைய அரிப்பும் தடிப்பும் குறைய, அதிக வாய்ப்பிருக்கிறது.
கருங்காலிக்கட்டைத் தண்ணீரைக் குடிப்பதும் நலமே. சுமார் 15 கிராம் கருங்காலிக் கட்டை, 1 லிட்டர் தண்ணீருடன் வேக வைத்து, 1/2 லிட்டராகக் குறுக்கி, ஒருநாளில் பலதடவை சிறிது சிறிதாகப் பருகி வரவும்.

நன்றி : தினமணி கதிர்

Sunday, October 9, 2011

இயற்கை உணவு-NATURAL FOOD HABIT

இயற்கை உணவு-NATURAL FOOD HABIT
ஸ்பேஸ் லா(வெளி விதி)
வெளி விதி என்ன சொல்கிறதென்றால் மக்கள் வசிக்கும் பகுதியில் எந்த
இயற்கை உணவு மிகுதியாக கிடைக்கிறதோ அதை உண்டு வந்தாலே போதும்.
வெளிநாடுகளில் இருந்து உணவை இறக்குமதி செய்ய வேண்டியதில்லை. வேறு எந்த
ஜீவராசிகளும் உணவை இறக்குமதி செய்து உண்பதில்லை. அவைகள் அவை வசிக்கும்
பகுதியில் என்ன உணவு கிடைக்கிறதோ அதையே உண்டு வாழ்கின்றன. எதில் புரதச்
சத்து, மாவுச் சத்து, கொழுப்பு, விட்டமின்கள், உப்புகள் இருக்கிறது என
பார்த்து உண்பதுல்லை. ஆனால் அவை தங்களின் வாழ்நாளை ஆரோக்கியமாகவே
கழிக்கிறது. இந்தியாவில் மிகவும் எளிதாக கிடைக்கும் தேங்காய், பேரிச்சை,
வாழைப்பழம் இவற்றிலேயே வேண்டிய சத்துக்கள் அனைத்து உள்ளன. இவை வருடம்
முழுவதும் எளிதாகவும், விலை குறைவாகவும் கிடைக்கும். மேலும் அந்தந்த
சீசனில் கிடைக்கும் பழங்களையும் உண்ணலாம். (மாம்பழம், சப்போட்டா,
தர்பூஸ் போன்றவை). விலை அதிகமான பழங்களை வாங்க இயலாதவர்கள் தேங்காய்ப்
பால், காய்கறிகளின் ஜுஸ்கள், கீரை(புதினா, கொத்தமல்லி, கருவேப்பிலை,
பாலாக்கு) ஜுஸ்கள் பருகலாம். டின்களில் அடைக்கப்பட்ட உணவுகள்,
புரதச்சத்து கொண்ட உணவுகள், ஆரோக்கிய பானங்கள் தேவையில்லை. இயற்கை உணவு
உண்டால் போதிய பலம் கிடைக்குமா என்ற சந்தேகம் கொண்டவர்கள் வெறும் இலை
தழைகளை மட்டுமே உண்டு வாழும் யானையையும் அது கொண்டுள்ள அபார வலிமையையும்
நினைத் துப் பார்க்கவேண்டும். யானை வேற்று ஜீவராசிகளின் பாலையும்
அருந்துவதில்லை. முட்டையையும் ஆம்லெட் போட்டு சாப்பிடுவதில்லை.

சமையலுணவில் குறைக்கவேண்டியவை மற்றும் அதற்கு மாற்று உணவு
குறைக்க வேண்டியது மாற்று உணவு
(1) சர்க்கரை வெல்லம், கரும்பு சர்க்கரை கருப்பட்டி
(2) பொடி உப்பு கல் உப்பு
(3) கரையாத கொழுப்பு கரையும் கொழுப்பு
கொண்ட எண்ணெய் கொண்ட எண்ணெய்
(4) மிளகாய் மிளகு
(5) புளி எலுமிச்சை
(6) கடுகு சீரகம்
(7) காபி,டீ லெமன் டீ, ப்ளாக் டீ,
சுக்கு
காப்பி, வரக்காப்பி
(8) பாலிஷ் செய்த அரிசி அவல், சிகப்பரிசி

இந்த மாற்று உணவு (மிளகு, எலுமிச்சை, சீரகம் தவிர) சமைத்த உணவை
தவிர்க்க முடியாதவர்களுக்கு மட்டும். இவை இயற்கை உணவு அல்ல.
இவற்றினால் சிறிது தீமை குறைவு.
சாறு உண்ணா நோன்பு (ஜுஸ்பாஸ்டிங்)

வெறும் நீர் அருந்தி உண்ணா நோன்பு இருக்க முடியாத பட்சத்தில் சாறு
உண்ணா நோன்பு இருக்கலாம். இதில் பழச்சாறுகள் மட்டுமே அருந்த வேண்டும்.

நன்மைகள்:
(1) உணவு திரவ வடிவில் இருப்பதால் ஜீரணத்துக்கு தேவைப்படும் ஆற்றல்
மிகவும் குறைவு. எனவே உடலின் ஆற்றல் முழுவதும் கழிவுகள்
வெளியேற்றத்துக்கு உபயோகப்படுத்தப் படுகிறது.
(2)உடல் எளிதாக ஆற்றலை கிரஹித்துக் கொள்ளும்.
(3)சாறுள்ள பழங்களின் ஜுஸ்கள் (திராட்சை, ஆரஞ்சு, சாத்துக்குடி,
மாதுளம் பழம் போன்றவை) அதிகமான க்ளுக்கோஸ் சத் துக்களை கொண்டுள்ளதால்
உடல் நிலை பாதிக்கப்பட்டோர் விரைவில் குணமடைய உதவுகிறது.
(4) மிகவும் உடல்நிலை பாதிக்கப்பட்டோர் இதை ஜீரணிக்க எளிதாக உணருவர்.
சாறு உண்ணாநோன்பின் போது கவனிக்க வேண்டியவை
(1) திரவ வடிவில் இருப்பதால் நார்ச்சத்து கிடைப்பதில்லை.
(2) மலச்சிக்கல் மற்றும் மூலவியாதி இருப்பவர்களுக்கு இது உகந்தது
அல்ல. அவர்கள் இயற்கை உணவை உள்ளது உள்ள படியே (நார்ச்சத்துடன்) உண்ண
வேண்டும்.
(3) சாறுண்ணா நோன்பின் போது மலச்சிக்கல் ஏற்ப்பட்டால் ஒரு நாளைக்கு
ஒரு முறை எனிமா எடுத்துக் கொள்ளலாம்.
இயற்கை உணவும் இரத்தத்தின்தன்மையும்

இரத்தம் காரத்தன்மை (ஆல்கலைன்) உடையது. இயற்கை உணவும் காரத்தன்மை
உடையது. எனவே இயற்கை உணவு எளிதாக இரத்தத்தின் காரத் தன்மையை சமன்
செய்யும். ஆனால் சமைத்த உணவு அனைத்தும் அமிலத்தன்மை (அசிடிக்) உடையது.
எனவே அது இரத்தத்தை அமிலத்தன்மை உடையதாக்கும். ஆனால் உடலோ மீண்டும்
இரத்தத்தை காரத்தன்மை உடையதாக்க போராடும். அந்த போராட்டத் தில் உடல்
தோல்வியடையும் போது நாம் நோய்வாய்ப்படுகிறோம்.

அக்கு பிரஷர்(ஒருவரின் குணத்தை மாற்றுவது எப்படி?)

இது நோய்கள் நீங்க கைகளுக்கும் கால்களுக்கும் அழுத்தம் கொடுக்கும்
ஒரு முறையாகும். (இது அக்குபங்சர் கிடையாது. இதற்கு ஊசியோ முறையான
படிப்போ தேவையில்லை), ஆனால் அக்குபிரஷர் மட்டுமே நோய்களை குணமாக்க
போதுமானதல்ல. இயற்கை உணவு உண்பதே நோய் குணமாக அஸ்திவாரமாகும்.
இயற்கை உணவும் உண்டு அக்கு பிரஷரையும் செய்து வந்தால் நோய் விரைவில்
குணமடையும். உடலில் உள்ள ஒவ்வொரு உறுப்பிலிருந்து வ ரும் நரம்புகளும்
உள்ளங்காலில் மற்றும் உள்ளங்கையில் முடிவடைகிறது என்ற் உண்மையை கொண்டு
அக்குபிரஷர் செயல்படுகிறது. பாதிக்கப்ப ட்ட பாகத்திற்குரிய பாயிண்டில்
நாம் நம் கைகளில் மற்றும் கால்களில் அழுத்தம் கொடுத்தால் ஒரு சிறிய
மின்காந்த அலை எழும்பி பாதிக்கப்பட்ட உறுப்பை சென்று அடைகிறது. இதனால்
பாதிக்கப்பட்ட பகுதி குணமடைய ஆரம்பிக்கிறது.
வலியுள்ள இடத்தில் அழுத்த வேண்டும் என்பது அக்குபிரஷரின் விதியாகும்.
பாதிக்கப்பட்ட பாகத்திற்குரிய பாயிண்டில் நாம் அழுத்தம் கொடுக்கும்
பொழுது நோயின் தன்மைக்கேற்ப வலி தெரியும். (இந்த வலி கொடுக்கப்படும்
அழுத்தத்தை விட வித்தியாசமாக இருக்கும்.) வலி அதிகமாக இ ருந்தால் அந்த
உறுப்பு அதிகமாக பாதிக்கப்பட்டிருக்கிறது என்று அர்த்தம். அதற்கு
பயப்படத்தேவையில்லை. இயற்கை உணவு உண்டு அக்கு பிரஷரும் சரியாக செய்து
வந்தால் நோயிலிருந்து விரைவில் விடுபடலாம்.

நம் உடலில் நாளமில்லா சுரப்பிகள் உள்ளன. அவையாவன:
(1)பிட்யுட்டரி
(2)பீனியல்
(3)அட்ரீனல்
` (4) பான்கிரியாஸ்
(5) நாபிச் சக்கரம்
(6) தைராய்டு
(7) பாலியல் சுரப்பிகள் ஆகும்.

இவை ஒரு மனிதனின் குணத்தை நிர்ணயிப்பதில் முக்கிய பங்கு வகிக்கிறது.
இவை சரியாக செயல்பட்டால் ஒருவர் அன்பு, தைரியம், கருணை, வைராக்கியம்,
பொறுமை, எளிமை, பொது நலம், சுறுசுறுப்பாகவும் சந்தோஷமாகவும் இருப்பர்.
இவை சரியாக செயல் படாவி ட்டால் அதிக காமம், கோபம், பிடிவாதம்,
அமைதியின்மை, சிடுசிடுப்பு, ஆடம்பர பொருட்கள் மேல் மோகம், கோழைத்தனம்,
அதிக ஆசை, சுயநலம், சோம்பேறித்தனம், சோர்வு, தற்கொலை எண்ணம், திருடும்
எண்ணம், கொடூரம், பயம் போன்றவற்றுடன் காணப்படுவர். எனவே மனரீதியான
பிரச்னை உள்ளவர்கள் இயற்கை உணவு, தியானம் மற்றும் அக்குபிரஷர்(முக்கியமாக
நாளமில்லா சுரப்பிகளில் எந்த சுரபி குறைபாடுடன் இ ருக்கிறது என
கண்டுபிடித்து அதற்கு அழுத்தம் கொடுக்க வேண்டும்) செய்து வந்தால்
வியக்கத்தக்க மாறுதல்களை காணலாம். குற்றவாளிகளை கூட இந்த சிகிச்சை
முறையால் திருத்தி விட முடியும்.

நாளமில்லா சுரப்பிகளை தவிர மற்ற உறுப்புகளுக்கு கடைகளில்
விற்கப்படும் அக்குபிரஷர் உருளைகளை வாங்கி பயன்படுத் தலாம். மேலும்
சீப்பு, துணிகிளிப், ரப்பர் பாண்டு, மரக்குச்சி, துணி துவைக்கும் பிரஷ்
கூட பயன்படுத்தலாம். இவைகளை கொண்டு நாம் டிவி பார்க்கும் பொழுதும்,
கணினியில் வேலை செய்யும் பொழுதும், புத்தகங்கள் படிக்கும் பொழுது கூட
நேரத்தை வீணாக்காமல் அக்குபிரஷர் கொடுக்கலாம். நாளமில்லா
சுரப்பிகளுக்கு மட்டும் கட்டை விரலால் செங்குத்தாக அழுத்தம் கொடுக்க
வேண்டும்.

மேலும் விவரங்களுக்கு 'நம் நலம் நம் கையில்’ என்ற தேவேந்திர வோரா
அவர்கள் எழுதிய புத்தகம் உதவும். இந்த புத்தகம் நமது பாரத பிரதமராக
இருந்த மொரார்ஜி தேசாய் அவர்களால் பாராட்டப்பட்ட புத்தகமாகும். அவர் 90
வயது வரை வாழ்ந்தவர் என்பது குறிப்பிடத் தக்கது. இந்த புத்தகம் மேலும்
ஆங்கிலம், ஹிந்தி, குஜராத்தி, மராத்தி ஆகிய மொழிகளில் கிடைக்கிறது.
பல்வேறு நோய்களுக்கு (கேன்சர், மூளைப் புற்று, எய்ட்ஸ், நீரிழிவு, இரத்த
அழுத்தம் உட்பட) அழுத்தம் கொடுக்க வேண்டிய பாயிண்டுகள் புத்தக த்தின்
பின்பகுதியில் கொடுக்கப்பட்டுள்ளது. இதை பார்த்து நாமே நமக்கு அழுத்தம்
கொடுக்க வேண்டிய பாயிண்டுகளை கண்டுபிடிக்கலாம்.

கெட்டப் பழக்கங்களான புகை, புகையிலை, குடிப்பழக்கம், போதை மருந்து
போன்றவற்றிலிருந்து விடுபட வேண்டிய பாயிண்டு களும் இந்த புத்தகத்தில்
தெளிவாக கூறப்பட்டிருக்கிறது. நமக்கு நாமே டாக்டராகிவிடலாம். நமக்குரிய
சிகிச்சையை நாமே முடிவு செய்து கொள்ளலாம்.

உண்ணா நோன்பு

ஸ்பெயின் பொன்மொழி: 100 வைத்தியர்களை அழைப்பதை விட ஒரு வேளை உணவை இழப்பது மேலானது.
ஸ்காட்லாந்து பொன்மொழி:தனக்கு நோய் உண்டாகும் வரை உண்ணும் ஒருவன் நோய்
குணமாகும் வரை உண்ணாமலிருக்க வேண்டும்.
உண்ணா நோன்பு ஒரு உயரிய மருந்தாகும். அது ஜீரண மண்டலத்திற்கு ஓய்வு
தருகிறது. பஞ்சத்தால் பட்டினியால் மரணம் அடைபவர்களை விட பெருந்தீனீ
உண்டு மரணம் அடைபவர்களே அதிகம். விலங்குகள் கூட உடல் நிலை
சரியில்லையென்றால் உண்ணாவிரதம் இருக்கும். மனிதன் மட்டுமே உடல் நிலை
சரியில்லாத போதும் உண்டு உடலை சீரழிக்கிறான்.

உண்ணா விரதம் இருப்பது எப்படி?
தாகம் எடுக்கும் போது தண்ணீர் மட்டுமே அருந்த வேண்டும். இயலாதவர்கள்
பழரசங்கள் அருந்தலாம். சிறிது உடல்நிலை தேறிய பிறகு சாறுள்ள பழங்கள்
(திராட்சை, சாத்துக்குடி, மாதுளை, தர்பூசணி, ஆரஞ்சு) போன்ற பழங்களையும்
பிறகு சதையுள்ள (ஆப்பிள், பப்பாளி) முதலிய பழங்களையும் உண்ணலாம். உடல்
நிலை சீரான பிறகு கொட்டை பருப்புகள் சேர்த்துக் கொள்ள வேண்டும்.
உண்ணவிரதம் இருக்கும் போது ஓய்வெடுப்பது அவசியம். காற்றோட்டமுள்ள
இடங்களில் ஓய்வெடுப்பது நல்லது. நம் ஆற்றலை உறிஞ்சும் வேலைகளான டிவி
பார்ப்பது, அதிகம் பேசுவது, இசை கேட்பது, அதிக தொலைவு நடப்பது போன்றவை
கூடாது. வாழ்க வளமுடன்